時來風送滕王閣，運去雷轟薦福碑。一啲都冇講錯o架，香港近年時運不佳，諸事不順，好難得至聽到大熊貓有喜嘅好消息，仲可能係孖胎添，以為可以沖吓喜喇，點知又係食詐胡，一場歡喜一場空。
過去一個星期，好多市民都經歷得而復失嘅失落。十月一日海洋公園宣布大熊貓盈盈有咗，預計四至十日內分娩，全城為之雀躍，為香港終於有首名原居民熊貓BB誕生而感到興奮，點知尋日園方驚報噩耗，證實盈盈流產，腹中胎兒已無心跳，而且部分可能被母體吸收，四分五裂，潰不成形。至於盈盈究竟點解突然流產，連當局都解釋唔到，令事件更添幾分詭異。
查實盈盈懷孕中空寶已經唔係第一次，由一一年開始曾多次傳出有喜，可惜全部係假懷孕。好嘞，有關方面將盈盈送回原居地四川配種，結果「造熊成功」，超聲波都睇到喇，有人仲打趣話係「單非」添，如今臨盆在即，又係功虧一簣，唔通真係天意難違？唔通香港真係冇運行？
咁講唔係無的放矢o架，盈盈同樂樂係中央政府喺香港回歸十周年送畀香港嘅禮物，而「盈盈」、「樂樂」呢兩個名更加係由全港市民投票選出，寓意香港豐盈快樂，家陣盈盈流產，胎兒夭折，對香港係吉兆定係凶兆，畫公仔唔使畫出腸。咁講喇，國寶熊貓命途多舛，有喜變流產，咪就係香港流年不利、時運不濟嘅徵兆囉。
講起真係令人唏噓。曾幾何時，香港係人所欽羨嘅福地，風調雨順，政通人和，可惜時移勢易，回歸後風雨不斷，烏煙瘴氣，自然界嘅不祥之兆亦愈嚟愈多，唔係百年古樹頹然傾倒，就係風雲突變三月飛雹；唔係中華鱘集體離奇枉死，就係鬧瘟疫搞到雞犬不寧，你話係巧合都冇人信喇。玄學中有所謂天人感應嘅說法，當一個地方妖孽橫行衰落沉淪，或者官府倒行逆施激起天怒人怨，老天爺就會降下異象示警，如果為政者再唔反躬自省，遲早爆大鑊嘅咋！
都係嗰句喇，天之所降曰災，人之所致曰禍。香港淪落到今日嘅田地，一切都係自己攞嚟，港府固然無能無德，政客同樣無良無恥，香港有乜法子唔亂呀。呢，香港大學被政治化入侵，國際排名好似食咗瀉藥咁，咪就係香港衰落嘅縮影囉。
信不信由你，當年九七回歸中央政府特登送個紀念寶鼎畀香港，寓意中央鼎力相助，庇佑香港，點知寶鼎安裝時三隻腳居然斷咗一隻，已經係不祥之兆。家陣國寶熊貓離奇流產，睇嚟香港仲有排亂，市民都係要自求多福咯！