有道是：愛拚才會贏，愛女才會溝，愛醉才會嘔；有前無後，打死罷就；有車有樓，最多做到九點九。然而，此種「獅子山下精神」，不但在民間逐漸消失，就連政府做事亦拖拖拉拉，議而不決，一樁「鉛水風波」，充分凸顯特區政府管治無能，有錯卸責，完全沒有承擔嘅精神！
鉛水風波爆發逾三個多月，有關當局只忙成一團，為受鉛水之禍嘅居民抽血驗血、加濾水器、供應樽裝水……然而，卻是勞而無功，第一條「鉛水邨」九龍灣啟晴邨嘅住戶，據悉仍然不敢取用「奶白水」；而房委會嘅檢討委員會，日前公布嘅中期鉛水報告，被議員怒轟「無問責、無懲處」，試問如此「側側膊」，想博「唔多覺」，咁嘅報告，直情係嘥公帑，亦顯示政府處事，一味「頭岳岳、四圍踱」，成事不足，敗事有餘！
事實上，鉛水之禍，除了總承建商、分判商、地盤主管、判頭、持牌水喉匠對「接駁銅喉焊料不可含鉛」嘅「忽略」和「認知」外，歸根究柢，其實係房屋署及房委會嘅監管制度存在太多甩漏，而水務署負責發出驗水證明書前，只查一部分，如驗殘餘氯、埃希氏大腸桿菌等，卻沒有根據世衞訂下的《飲用水水質準則》驗食水嘅含鉛量。
如此這般的一層層疏忽，有「監管」等於冇監管，求求其其，管你是誰；渾渾噩噩，把關不力，就咁養了一大班廢柴！
呢，運房局局長兼房委會主席張炳良如此回應「鉛水之禍」：鉛水誰要負責？獨立調查委員會詳細去看。房委會檢討委員會的報告主要是對房委會的監管制度、物料品質管制及其他相關測試作一個「體檢」。
特區管治之「問責」等於「過晒鐘，玩失蹤」，香港呢個「福地」，今後睇怕只會在「體檢」中繼續沉淪！