政情：開會無期 張建宗咪開心住
今屆立法會得返嚟緊最後一個立法年度，不過剩低嘅工作都唔少。睇番立法會各個研究政策事宜小組委員會嘅情況，依家有十個運作緊同即將展開工作嘅小組委員會中，有七個都徵求緊立法會內務委員會延期，而喺輪候名單上嘅小組委員會就有三個，分別涉及標準工時、強積金對沖安排同埋長者服務計劃未來發展，全部都屬於勞工及福利局範疇。既然開會無期，勞福局局長張建宗（小肥張）暫時可以抖吓喇！
議員話遲早要「盤點清貨」
提出成立標準工時、同強積金對沖兩個小組委員會嘅勞工界立法會議員鄧家彪同郭偉強都話，擔心到今屆立法會完結，兩個小組委員會都開唔成會。鄧家彪仲話，秘書處人手長期緊張，好難叫佢哋安排人手加開小組委員會，亦都好難叫現有嘅小組委員會「讓路」。不過佢就提醒小肥張，社會壓力持續存在，當局點都要「盤點清貨」喎！