政情：體育遭輕視 霍震霆暗批政府
早前我哋見到港協暨奧委會會長霍震霆（Tim）同兒子霍啟山（Eric），針對近日國際足協就香港球迷噓國歌一事處罰香港足總，Tim就話，被罰近四萬已經算輕判。佢話，噓國歌反映一個地方嘅文明程度，小部分人嘅不當行為會影響香港形象。
至於Eric就認為，下月中港大戰難以控制球迷不再噓國歌，惟有勸喻球迷尊重國際足協條例喇！
講開香港體育發展，Tim認為政府唔應該輕視體育帶來嘅商機。佢仲帶有微言話，次次叫政府申辦亞運都話無場地，暗批政府只重金融、地產。Tim更認為，體育盛事能夠吸引遊客，仲話單靠購物遊客好快對香港生厭。
霍啟山「小球推動大球」
Eric除咗係足總董事，亦係小型足球總會會長，佢希望以「小球推動大球」，因為小型足球場地較多，較易推廣令足球普及，吸引多啲後生仔入行。