政情：兩學府選校董 恐遇突襲
香港大學副校長任命風波沒完沒了，連帶港大校委會人選及組成都備受關注，校委會主席梁智鴻及一批校委快將「夠鐘」，預料稍後會有新人獲任命頂上，另一方面，由立法會議員互選產生嘅五名港大校董會成員，其三年任期於本月十九日屆滿，港大副校風波會否令激進泛民議員趁機借題發揮參選，係目前一大變數。綜合各方消息指，建制泛民擬繼續維持三對二比例，換言之民建聯鍾樹根同教育界議員葉建源等人，如無意外會齊齊冧莊出任港大校董，不過政治一日都嫌長，加上教育泛政治化成為新常態，會否出現最後一分鐘嘅突襲，到時自有分曉。
鍾樹根「做開繼續做」
據《香港大學條例》及《香港中文大學條例》規程，由立法會議員互選產生嘅五名港大校董及三名中大校董，其三年任期於本月中屆滿，內務委員會將於本月十六日選出新任港大及中大校董。資料顯示，即將任期屆滿嘅五名港大校董，分別為鍾樹根、葉建源、地產建造界議員石禮謙、獨立議員謝偉俊及民主黨涂謹申，據聞雖然港大副校風波鬧得滿城風雨，似乎無阻五人再度爭取冧莊出任港大校董。
其中三年前曾被外界質疑英文水平未必適合任港大校董嘅鍾樹根話，打算做開就繼續做，又自爆曾向校方提出好多意見，認為做到相當大嘅監察作用；謝偉俊亦話有興趣做落去，但同時指出校董會機制唔靈活，每次開會人多但時間唔長。
中大原人腳欲連任
身為港大校友關注組召集人嘅葉建源透露，泛民已就此作出協調，暫未聽聞有任何人選變動。當問及係咪想為港大副校風波一事發聲，葉坦言校董會影響力唔大，而且一年只開一次會，想繼續做純粹係身為校友，對港大有歸屬感喎。
中大校董會方面，依家三名由立法會議員互選嘅代表為民建聯葛珮帆、飲食界議員張宇人及新民主同盟范國威，其中前兩者都表態有興趣連任，其中張宇人話，自己於二○○八年開始任中大校董會成員，一直出席率都比另外兩位議員校董為高，過去幾年都有份參與中大事務亦覺得好滿足。不過話雖如此，據聞三年前同中大校董位置擦身而過嘅人民力量陳志全，有意今年捲土重來參選，或者到時又有一場激戰嘞！