中環出更：新聞處甩轆 報道「檢控梁振英」
政府新聞處「甩轆」，檢控曾蔭權變檢控梁振英！現任特首梁振英前日朝早出席行政會議前，就律政司檢控前特首曾蔭權爵士發表評論。惟政府新聞處其後在社交網站Twitter以英語報道有關發言時，竟將「曾蔭權」錯誤寫成「梁振英」，全句變成「特首梁振英指律政司決定檢控前特首梁振英...」，令人質疑新聞處有人「作反」。
最羞家嘅係，今次出錯竟然係英國駐港澳總領事吳若蘭發現，並在Twitter公開指正新聞處打錯字。有網民更揶揄有關錯誤其實係「預言」，預示兩年後發生嘅事......
自動校正出錯
新聞處之後急急刪去有關報道，並於下午在另一社交網站facebook回應事件，自言並非預言家，而是自動校正系統設定一見到英文「特首」字眼，便會彈出梁振英的名字，有關設定現已取消。不過，就算真係自動校正系統問題，「出街」前理應有人用肉眼再核對一次，絕對無得卸責囉！
卓妮