中環出更：曾蔭權生日去教堂懺悔？
被廉政公署落案起訴嘅前特首曾蔭權爵士尋日七十一歲生日，佢太太曾鮑笑薇下午乘專用座駕返去位於渣甸山畢拉山道高級公務員宿舍嘅寓所時，失驚無神向在場傳媒派發壽包，然後再返上座駕同曾蔭權一齊前往半山堅道教堂，逗留咗大約一小時後先至離開。戴上紅色煲呔嘅曾蔭權連生日正日都去教堂，唔知佢係去祈求保佑，定係去懺悔呢？
曾蔭權夫婦自從本周一出庭應訊之後，一直未有公開露面。尋日下午大約五時，一向接載曾蔭權嘅座駕忽然停泊喺畢拉山道高級公務員宿舍外嘅路口，其中一個保鏢先落車向在場傳媒招手示意，冇幾耐，身穿質料輕薄嘅橙色旗袍，再襯一件粉紅色花圖案外套嘅曾鮑笑薇，就手持兩盒壽包落車，然後行埋記者度。
老婆派壽包
曾鮑笑薇話，收到市民贈送嘅壽包，佢啱啱好蒸熱咗，所以攞嚟派畀大家，仲同記者講︰「你哋辛苦喇！」不過當記者問佢，同曾蔭權去邊度慶祝生日時，佢就笑而不語，轉身返回座駕。卓妮睇真啲，壽包係某酒家出品嘅「燕窩養顏流沙包」，不期然令人想起，佢哋請過人食過期一年嘅月餅。
到咗傍晚，卓妮又喺堅道教堂見到曾蔭權夫婦，佢哋喺教堂逗留咗大約一小時後，喺多名G4保鏢陪同下離開。不過適逢落大雨，幾位保鏢就一邊幫曾蔭權擔遮，一邊護送佢哋離開。見佢哋兩公婆急急腳上車走人，唔通佢哋趕住去食飯慶祝牛一？
卓妮