「積咗成攤水喺度，又冇人去清理，依家天氣都仲未轉涼，蚊蟲仲會孳生，咁搞法咪好容易變蚊竇？」鰂魚涌居民劉先生早前發現鰂魚涌市政大廈天台積水，惟遲遲未見清理，擔心惹來蚊患，對市民健康構成影響，「政府成日叫人防蚊，又話啲蚊可以傳播好多疾病，但原來連政府自己都冇帶頭做好。」
康樂及文化事務署發言人證實事件，估計肇因為雜物淤塞排水口及排水喉管老化，經清潔後無再發現積水。發言人補充，已要求工程部門更換老化排水口及排水喉管，預計有關工程將於十月底完成。
劉先生認為康文署負責管理涉事市政大廈，有責任確保設施運作良好，更指事件反映部門有失職之嫌，「老化都唔係一日半日嘅事，康文署唔應該後知後覺，投訴到先去做檢查。」