三國時代文學家曹植有篇名作《洛神賦》，一句「丹唇外朗，皓齒內鮮」傳誦千古。呢個「鮮」字，即係牙齒光鮮明亮咁解，證明丹唇皓齒自古以來就係美女嘅必要條件之一。
古人追求美麗，今日更加唔例外，人人都想擁有潔白牙齒，就算唔係天生麗質，都想後天補救。所以咯喎，藍光漂牙服務應運而生，唔少人寧願節衣縮食，亦不惜花費巨資整靚棚牙。問題係，法例規定只有執業牙醫至有資格進行漂白牙齒服務，但唔少美容院見有利可圖，紛紛踩過界提供漂牙服務，而且以團購優惠搶客，最平百元就有交易，導致法例形同虛設，成個行業好似無王管咁，亂象叢生。
呢，本報記者去一間提供藍光漂牙療程嘅美容院睇過，一入門口就有職員落力推銷，聲稱團購價嘅漂白效果未夠理想，要求加錢試用六十度超高濃度療程，每五日一個療程，連續做四個療程，效果會更顯著咁話。
事實又係點呢？聽吓香港牙醫學會嘅專家點講啦，漂牙屬於醫療行為，如果職員冇專業知識和資格，可能增加風險，好易出事；特別係部分美容院用超高濃度漂白劑，聲稱美白效果更快更持久，其實分分鐘對牙齒及牙肉造成永久傷害。舉個例，漂白劑濃度去到百分之二十已經好高，點知有啲美容院居然用到六十度，簡直匪夷所思。
唔係講笑（口架），用咗成分不明嘅漂白劑，無漂白效果不特止，而且隨時令牙肉發炎，嚴重嘅可能導致牙肉萎縮，千祈唔好亂試吖。
所以話，當局對美容行業放任自流，無監無管，直情係靠害。係人都知，美容業一向良莠不齊，質素參差，搞到頻頻出事，甚至曾搞出人命添。三年前發生嘅美容毒血針事件就導致一死三傷，令醫學美容無王管嘅亂象暴露無遺，當局事後又檢討又補鑊，聲稱要立法規管美容服務，點知拖到舊年至發出一份冇法律約束力嘅指引，話就話區分醫療與美容行為，但只係要求業界自律，被視為無牙老虎。
老實講，如果當局真係要規管，點會做唔到吖。法例規定任何人如非註冊牙醫而提供漂牙服務，都可能觸犯《牙醫註冊條例》，只要衞生署依法辦事，就唔會搞成咁喇。港產官僚敷衍塞責，既唔監管，又唔執法，就算有人觸犯法例，都係隻眼開隻眼閉，想唔出事都幾難。
正所謂，人命關天。美容行業七國咁亂，消費者固然要打醒十二分精神，唔好攞自己條命較飛，而當局更要加強監管，做好自己份工，唔好又係見到棺材至識流淚吖！