政情：自創品牌 許穎嘉滿足女士天性
貪靚係女士們嘅天性，不過依家啲飾物手袋款式轉換得咁快，名牌定價又愈來愈高，想話每季追新款，都咪話唔肉赤。家族從事眼鏡代工生產嘅香港青年聯會成員許穎嘉（Candy）兩年幾前就睇準網上銷售嘅趨勢，於網上售賣為亞洲人度身訂造色彩鮮艷嘅太陽眼鏡及真皮手袋，由於可以節省舖租等成本開支，同樣嘅物料及質素價錢相對合理得多，女士轉季想換款可以慳番唔少。
Candy話，好多大品牌嘅成本都係花咗喺廣告宣傳及租金上，導致產品定價過高，靚就係靚，但做唔到物有所值。
網上開舖成本大減
佢話喺網上賣就唔同，成本比較低，加上佢哋自己有廠，熟悉生產過程，於是佢就成立自家品牌，設計適合亞洲人面形嘅太陽眼鏡，並採用質素好嘅偏光鏡片，售價卻比同一品質的其他牌子低。至於真皮手袋就特別着重色彩，Candy話要滿足女士對手袋的情意結喎。