灣仔：雪糕筒堵路自設違泊車位

「嗰個位係掉頭位，但係就成日有啲車泊喺度頂到實一實，仲要放幾個雪糕筒喺度，好似當正條街畫咗畀佢，係私家泊位咁！」職業司機陳先生不時於灣仔麥加力歌街掉頭駛往太原街，惟因上址時有車輛違泊，造成阻塞，「附近又唔係冇停車場，唔係因為冇得揀所以咁做，純粹係因為貪免費同方便。」

警方發言人證實，本年至今共接獲二十九宗涉及太原街車輛違例停泊的投訴，共發出一百八十五張定額罰款告票。發言人承諾會繼續留意有關情況，如有車輛造成阻塞，將會採取執法行動。

陳先生近日再次駛經涉事路段，惟發現問題依舊，促請警方加強巡察，以免道路淪為免費停車場，「要畀到個明確訊息嗰啲車主，等佢哋知道亂咁泊車係有代價嘅，咁就自自然然會去番適當嘅地方泊車。」