春秋時代，晉獻公愛妾驪姬想立自己兒子做太子，諗到一招借刀殺人毒計，派太子申生同兩位兄弟守城抗敵，搞到負責築城嘅大臣左右為難，事關個個都係老闆，無論點樣做都會得罪人，只能暗暗叫苦︰「一國三公，吾誰適從？」後世就用一國三公呢個成語形容政出多門。
好嘞，講完故事，講番現實。話說由於經濟前景唔明朗，加上美國隨時加息，本港樓市交投淡靜，有轉勢迹象，財政司司長曾俊華等財金官員急不及待，撲出嚟話會考慮調整樓市政策，令外界揣測港府可能減辣。點知話口未完，特首梁振英就兜口兜面摑咗佢一巴，強調房屋問題仍然嚴峻，大部分家庭負擔唔起樓價，辣招要持之以恒。嗱，港府兩大巨頭各有各講，一個話可能減辣，一個話唔減辣，究竟邊句真邊句假？正如「東方報業民意調查」顯示，大部分受訪者批評高官口徑不一，訊息混亂，令人無所適從。
不可不知，樓市好似金融市場咁，對官方消息特別敏感，一有風吹草動隨時引發震盪，家陣特首同財爺互扯貓尾，一個唱紅臉，一個唱白臉，唔係靠害又係乜。古人就講得啱嘞，為政不在多言，尤其係高官，一言一行對市場影響都好大，更加要謹言慎行，點可以好似山草藥咁，噏得就噏。試諗吓，萬一市場因為高官嘅言論而出現混亂，到時點收科呢？邊個孭鑊呢？
話時話，管治團隊各自為政，自打嘴巴，甚至勾心鬥角，大家早就見怪不怪咯。就以搞到人心惶惶嘅鉛水風波嚟講吖，呢頭教育局局長吳克儉實牙實齒話唔會為幼稚園驗水，嗰頭就畀政務司司長林鄭月娥推翻，你話仲有冇兒戲啲吖。大部分受訪者批評港府內部矛盾嚴重，統籌混亂，如同一盤散沙，唔係無的放矢。
所以話，港府無能，乜嘢怪事都有。今時今日，高官固然各自為政，連行政會議成員亦經常同政府唱反調，搞到集體負責制形同虛設。上樑不正下樑歪，日前港大學生會會長馮敬恩無視校委會嘅保密制，大爆會議內容，唔知係咪有樣學樣呢？
講起都幾唏噓，港英年代港督一言九鼎，令行禁止，從來唔會發生呢啲亂象；回歸後港府淪為跛腳鴨，管治團隊同床異夢，有人唱反調，有人放暗箭，搞到烏煙瘴氣，七國咁亂。難為北大人仲話特首地位「超然於三權之上」，你信唔信吖。
始終都係嗰句，面係人哋畀，架係自己丟。大部分受訪市民認為執政團隊唔團結，係施政寸步難行嘅主要原因，真係一語中的，港府聽到未吖！