零售業近期正處於寒冬，唔少商界中人都費煞思量應如何應對，本身於內地設廠嘅立法會紡織及製衣界議員鍾國斌就強調，即使依家嘅訂單數目下降，佢哋都暫時唔會考慮裁員，認為仲可以食住老本先，換言之觀察大約兩年時間，先嘗試用其他方法開源，睇吓有冇改善喎。
鍾國斌話，零售業嘅情況同廠嘅經營其實環環相扣，如果零售市道唔好，就會直接影響佢哋廠接訂單嘅數量。佢解釋，過去兩年零售業增長得比較快，累積嘅儲備依家就用得着，因此雖則依家市道較差，估計「食老本」都可以頂到一段時間。
佢續指，如果依家裁走啲工人，遲啲情況有好轉時，就會變得好難請人，因此寧願諗啲方法開拓新嘅收入來源同時節流，例如於緬甸設廠，佢相信於當地生產成本比較低，可以接到更多過往少做嘅訂單，好似中價位嘅服裝品牌等，趁機擴大客戶群。