政情：莫乃光黑仔 遊台兩遇颱
上星期颱風「杜鵑」吹襲台灣，呢兩日颱風「彩虹」逼近香港，原本兩個颱風對香港影響都唔大，不過資訊科技界議員莫乃光（Charles）就撞到正。事關上周三佢同朋友一齊去台中玩，因為「杜鵑」襲台而要改入住旅館，尋晚返港時又因「彩虹」導致台港班機亂晒籠而延誤，夠晒黑仔。
挑戰合歡山索晒氣
Charles喺社交網站分享呢幾日嘅行程，佢哋一行十幾人先到海拔二千米嘅清境農場，因為「杜鵑」吹襲而要改入住旅館。之後連續兩日挑戰合歡山，同行嘅立法會前議員陳淑莊一馬當先，Charles行到索晒氣，自嘲唔夠皮。玩足幾日之後，尋日下午準備返港時，又因為「彩虹」逼近香港令航班亂晒籠，Charles要搭嘅班機喺香港延遲起飛，連帶返港時間都延誤，真係好事多磨。