政情：鬍鬚曾辣親 樓市不消提
每逢周日化身「鍵盤戰士」寫網誌嘅財政司司長曾俊華（鬍鬚曾），上周日提到樓市有轉向下趨勢時，話「如果有需要，我們會在政策上作出一些調整」，被外界憧憬政府考慮減辣，結果兩日後遭特首梁振英（CY）高調澄清反駁，明確指「不會減辣」，猶如摑鬍鬚曾一巴掌。鬍鬚曾尋日發表嘅網誌，隻字不提樓市，但就十三次提及中央政府提倡嘅「一帶一路」，唔知係咪畀「辣椒」辣親，唔敢再提？
到咗尋日下午，鬍鬚曾出發前往美國及秘魯前接受訪問，亦未主動提及樓市及辣招，但當被記者問及市場預期樓市會下調兩至三成，政府會唔會調整政策減辣時，佢只係話政府目標係保持樓市平穩發展，唔敢正面回應，即係講咗等於冇講。
大講地區樞紐合作
可能係「經一事，長一智」，鬍鬚曾避談敏感話題，所以揀咗最政治正確嘅「一帶一路」國策發揮。佢喺網誌中回顧早前赴中歐匈牙利、波蘭和德國訪問見聞，認為香港非常有條件成為「一帶一路」嘅地區樞紐，所以香港應加強和不同地區樞紐聯繫合作，再利用呢啲地區作為基地，慢慢將香港市場輻射至「一帶一路」沿線地區。
鬍鬚曾舉例稱，香港擁有龐大國際商業網絡和人脈，以及會展和商業配對服務，非常適合作為商貿物流嘅促進平台。他又指，香港政府努力喺政府對政府（G2G）層面加強和各國聯繫合作，例如透過簽訂雙邊協議，促進和保障雙方投資云云。
樓市問題 避無可避
總之文中隻字不提市民關心嘅樓市，唔知係咪怕講多錯多呢？而且呢啲言論熟口熟面，似足CY一直強調香港作為超級聯繫人嘅講法，唔通鬍鬚曾知衰，暗中向CY示好？
講開又講，其實鬍鬚曾再度離港係參加於秘魯利馬舉行嘅國際貨幣基金組織和世界銀行年會，期間或有機會同美國聯儲局主席耶倫見面，唔知佢會否喺傾談之中，搵出幾時加息嘅端倪呢？講到尾，佢咪一樣躲唔過樓市問題？