中環出更：梁智鴻馮敬恩齊拒辭職
香港大學校務委員會否決法律學院前院長陳文敏出任港大副校長嘅風波，至今仍未平息，支持陳嘅一方要求校委會主席梁智鴻問責辭職，至於破壞校委會保密原則披露校委意見嘅學生會會長馮敬恩，同樣面對建制陣營要求自行離開校委會嘅呼聲，梁馮二人嘅立場南轅北轍，然而對辭職與否一事卻步伐一致，齊齊無意辭職。
梁智鴻尋日出席活動後再次就副校風波解畫，指每名校委都係港大信託人，以自己理據同原因投票，無受他人壓力同影響。對於有港大校友促請佢同否決任命校委辭職，梁智鴻稱自己處事公平，睇唔到有辭職嘅理由，又唔答邊個成為其繼任人等假設性問題。
馮被批唔識判斷「公義」
馮敬恩出席電台節目時續把矛頭指向梁智鴻，稱梁只剩一個月任期都要辭職，因為辭職有象徵性意義。不過話雖如此，馮敬恩因爆料破壞保密原則亦令自己一身蟻，佢死撐話自己嘅授權來自同學，只有同學能夠叫佢走，預計校委會最終會用十二張「鐵票」趕佢走。
出席同一場合嘅港大教育學院副教授李輝，表明唔認同馮嘅行為，形容對方仍在求學階段，能力及認知水準難判斷何謂「公義」，因此應該選擇遵守保密原則喎。
卓妮