中環出更：盼紓家長苦 蔡李惠莉想辦小學
沙田馬場尋日舉行保良局盃賽事，一眾保良局董事局成員及城中名人齊入場玩，包括副主席蔡李惠莉、總理李何芷韻（Amanda）等人。已經有五名孫仔孫女嘅蔡太着住件紅色連身裙現身，身形好弗。卓妮問佢新抱汪圓圓再度有喜嘅消息，蔡太笑笑口話，圓圓已經懷孕五個月，至於BB係男定女冇乜所謂。
講到時下小朋友搵學校難，已開辦一間幼稚園嘅蔡太都覺得好慘，佢話見到大女Carmen正為囝囝搵小學，好辛苦，但都冇計，等佢哋知道為人父母有幾辛苦都好。講講吓，蔡太爆料話好想辦一間小學，但係搵地方唔容易，唔係話想做就做到。
李文斌交畀太太撲學校
要四圍撲學校嘅仲有仁濟醫院前主席李文斌（Edmond）及太太Amanda。Amanda話，佢嘅一對孖生子女明年要升讀小學，由於係一男一女，要撲嘅學校唔同，填表、搵心水學校等工夫都要雙倍計，真係加倍辛苦，加上細仔亦要入幼稚園，佢話淨係幫三個小朋友填表已經忙到氹氹轉。咁Edmond有冇幫吓手？點知Edmond笑笑口話冇喎，因為佢驚一旦參與其中，兩人會有拗撬，所以索性交晒畀太太搞喎。
同場仲有保良局總理顧東華（William），加入保良局第二年嘅William話，保良嘅服務可以話係「老少咸宜」，無論安老、扶幼都做得好出色，而佢於最近兩個月忙於屋邨籌款，希望搵多啲善款為社會送暖。
卓妮