「悟已往之不諫，知來者之可追；實迷途其未遠，覺今是而昨非。」晉代陶淵明嘅詩句意境深遠，情操高尚，傳頌千古。諗唔到嘅係，港產官僚原來亦係覺今是而昨非，可惜同陶淵明嘅意境唔同，而係自打嘴巴，醜態百出。
話說十一黃金周黃金不再，市道冷冷清清，商務及經濟發展局局長蘇錦樑唔知攞景定贈興，日前大大聲話旅客有增長，十一長假期首日整體人數增加超過一成半，其中內地客仲增加一成六添。點知被人質疑作大，佢尋日急急補鑊，話唔能夠單憑一日嘅數據來判斷旅客訪港情況喎。蘇錦樑仲大談旅遊業發展大計，希望吸引高增值及過夜旅客，未來一年本港會增加一萬個房間提升接待力咁話。
港產官僚信口開河，唔到你唔服。其實，蘇錦樑使乜兜吖，係人都知佢九唔搭八嘅喇，明明旅遊業步入寒冬，零售、酒店、旅行社一條龍衰退，佢仲叻唔切出嚟「報喜」，唔惹來非議至奇喇。學業界人士話齋，黃金周市道蕭條，客流稀疏，而當局嘅旅客數字居然節節上升，如果唔係數據有水分，就係旺丁不旺財，官僚不以為憂，反以為喜，話唔係無能都無人信喇。
最諷刺嘅係，近年本港接待旅客能力瀕臨爆煲，各界不斷要求增加酒店房間，港府唔嗲唔吊，今日旅遊業步向萎縮，當局至話增加房間供應，你話係咪本末倒置吖。咪畀人睇死，當局以為增加房間數目，就可以吸引更多過夜客，隨時係一廂情願嘅咋。開講有話，灑掃庭院迎客來。香港烏煙瘴氣，激進組織不斷趕客，搞到雞犬不寧，呢啲亂象唔掃除，就算旅客想嚟香港，都敬而遠之喇。
講嚟講去，香港之所以搞到今日咁嘅局面，港府要負最大責任。當初旅客逼爆香港，當局闊佬懶理，既唔諗辦法疏導，又唔增加設施，一味等運到，結果咪觸發民怨，畀激進組織有機可乘囉。好喇，當問題同矛盾愈演愈烈，港府束手無策，反而跟隨激進派起舞，將「一簽多行」改為「一周一行」，搞到家陣旅客唔夠，又話要求中央增加個人遊城市，將旅客當成玩具，呼之則來，揮之則去，人哋睬你都傻喇。
講開又講，蘇錦樑舊年叫市民搭港鐵「等多一班車」，已經被人質疑「離地」，家陣又開口夾着脷，簡直係添煩添亂。不如咁喇，如果佢無心正事，不如學陶淵明返歸耕田囉。庸官歸去，造福人群，永遠都唔遲o架。