內地考生：今年十‧一長假期，香港市面明顯較去年同期冷清，好多零售、餐飲同酒店業人士都大呻生意大跌，再咁落去遲早要減薪、裁員、甚至關門大吉。偏偏商務及經濟發展局局長蘇錦樑，前日就公布今次長假期嘅首日訪港旅客人數不跌反升，被業界人士質疑佢「篤數」。原來，呢批所謂訪港旅客當中，可能有成萬人係專程來港參加SAT試嘅內地考生，佢哋嚟到就係為咗考試，唔係旅遊購物或者飲飲食食，相關業界自然未能受惠。希望蘇錦樑下次分析清楚先至發出「盈喜」，以免笑大人個口。
