泛民上一個立法年度突襲成功，取得立法會工務同人事編制兩個小組委員會控制權，令建制派方寸大亂。建制派喺政改表決甩轆之後一直想藉搶攻番十八個委員會正、副主席職位重振聲威，但隨住立法會復會在即，口風開始軟化。據悉，民建聯雖想藉搶攻報復，但其他獨立建制派就唔多想，自由黨仲講明唔會幫手冧友。睇嚟搶攻計劃最終都要擱置，建制派分分鐘再次甩轆收場。
據了解，建制派已調整計劃，決定主攻重要嘅事務委員會，如保安、政制、發展、司法及法律，以及資訊科技及廣播，同埋收復工務及人事編制兩塊失地。而次要嘅事務委員會如福利同衞生就留畀泛民。
不過，亦有保守啲嘅建制派擔心泛民玩嘢，建議都係每個委員會先入多於泛民人數嘅廿八人，搶咗話事權先，以免被過一棟。
另外聞說泛民已同建制派表明，內務委員會副主席人選只可以喺單仲偕或梁家傑兩個泛民議員中揀一個。而建制派普遍屬意單仲偕，認為佢較以和為貴。