政情：八網難逃：網民惡行 殃及盧寵茂女兒
港大副校長風波招致滿城風雨，雖然法律學院前院長陳文敏嘅任命已被否決，但事件未告一段落。疑喺表決時反對任命陳文敏嘅校委會委員盧寵茂，不但收粗口電郵，連佢喺外國求學嘅囡囡都被網絡起底，網民今次真係過晒火。
話說港大學生會早前衝入校委會會議室，期間盧寵茂倒地受傷。網民已經質疑盧寵茂扮嘢，仲惡搞模仿盧寵茂倒地姿勢影相。之前港大學生會會長馮敬恩爆料，話盧寵茂否決陳文敏任命係因為不滿陳文敏喺佢上次跌倒後無問候佢，結果網民又發起「＃我問候盧寵茂」行動。
被迫刪社交網帳戶
盧寵茂就話估唔到尋日仲有人對佢個女進行網絡起底，列出佢個女嘅個人資料，如就讀嘅大學、學系、電話等，就連佢個女嘅前男友都被公諸於世，仲搞到佢個女要即時刪除社交網站帳戶添。