政情：準爸爸恨上車 郭偉強想冧市
都係嗰句，又係土地問題！香港有唔少年輕男女，都係因為樓價太貴、買唔起樓而遲遲未結婚，或者結咗婚都唔敢生兒育女，驚多咗個家庭成員之後唔夠住。今年二月先至拉埋天窗嘅勞工界立法會議員郭偉強，原來話咁快佢太太已懷孕三個多月。就嚟榮升老竇，本來係一件喜事，但郭偉強就為BB出世後嘅住屋問題苦惱，寄望美國快啲加息同政府加大力度覓地建屋，推冧個市，令佢可以快啲置業迎接小生命來臨！
依家同父母同住嘅郭偉強，早喺拍緊拖嘅時候已經好希望買樓，但等到依家就嚟做老竇都未成事。佢同我哋講，希望可以喺BB出世前置業，就算係一房單位都好，等小朋友將來有多啲活動空間。不過佢最近睇樓時，發現所有啱佢心水同大細嘅樓盤，閒閒地都要四、五百萬元，擔心將來一加息自己就負擔唔起。
議席危危乎壓力大
郭偉強擔心自己嘅負擔能力，原因之一可能係現屆立法會只餘下一年任期，工聯會內部規定勞工界議員只能做一屆，之後就要讓位轉戰直選，但立法會各區直選議席向來都僧多粥少、競爭激烈，郭偉強想角逐連任，可謂困難重重，一旦落選就會收入大減，自然要小心計掂條數，真係好大壓力呀！
太太喺呢個時候懷孕，會唔會令佢分心呢？郭偉強就強調呢件係佢哋計劃之內，並非意外，因為太太希望小朋友屬猴，認為將來會活潑啲。佢暫時未知BB係仔定女，但就覺得係仔係女都冇咩所謂喇。
環境許可就生多個
至於佢心目中希望生幾多個，郭偉強話如果環境許可，都想小朋友有兄弟姊妹冇咁悶，不過最多都係兩個就夠晒數。對於之前家計會嘅宣傳片，話生夠五個可以組成一隊籃球隊，佢就自言有心無（財）力嘞。