中環出更：新一代棄升途老闆抓頭
以為個個打工仔都想升職？早排網上先流傳有打工仔不願被升職，仲話如果唔燉番佢冬菇，就寧願辭職唔撈，引起網民熱議，猜測箇中原因。卓妮之前喺香港潮屬各界嘅酒會上見到香港潮屬社團總會（總會）會董胡炎松，佢就話，有感新一代打工文化同過往有好大分別，佢有朋友就曾經試過補水叫下屬加班，但就被下屬請食檸檬，個下屬仲話不如畀番錢佢個朋友喎。
胡炎松話，依家嘅年輕人打工唔再淨係睇人工，仲追求好多其他條件，例如可唔可以達致生活平衡咁。除咗返工，佢哋都想保留一定時間同家人、朋友相處。好似有次佢個朋友叫員工加班，雖然講明會補番錢，但個員工都一口拒絕，仲要話：「不如老細我畀番錢你，你唔好要我加班。」
責任大咗 加薪都唔制
常務會董方平就話，以前嘅打工仔非常着重前景同發展，只要有得升職就一定會好開心，有時仲因為想賺多啲錢自動加班，經濟差時，甚至有員工自願減薪，希望唔好被炒魷。但依家工作文化大不同，對於有人寧願辭職都唔想升，佢都抓晒頭，因為升職通常都同人工掛鈎。方平就估計，有機會係工作量同責任大咗好多，人工又先加得少少，所以出現有人「寧願唔升」嘅情況。
同場仲有總會常董張俊勇、劉文文、鄭敬凱及潮州商會會董張詩培。經常來往內地做生意嘅佢哋，都唔少得用手機應用程式微信同工作夥伴聯絡，不過近日多個應用程式都被植入惡意代碼，出現安全漏洞。劉文文同鄭敬凱就話，用得智能電話預咗唔安全，所以重要嘢都唔會收埋喺電話。張詩培就話，電話內全部都係公開活動啲相，冇咩秘密。而張俊勇就笑言電話內有好多旅行時同太太、女兒影嘅相，如果影得唔夠靚嘅話，流出咗可能會被扭耳仔喎。
卓妮