古人話，萬方有罪，罪在朕躬。以前每逢有重大天災人禍，皇帝都會下罪己詔，可惜時移勢易，今日已經冇呢支歌仔唱咯。尤其係港府，賴得就賴，卸得就卸，錯嘅永遠係人哋，自己從來唔肯承擔責任，叫佢哋罪己喎，好難喇！
好似鉛水風波咁吖，房委會日前決定判罰四個承建商「停賽」半年，即係唔會考慮佢哋今年三月至九月所入嘅標書。其中三間原本持優質商標嘅承建商，更加被降呢至普通商標，今後可承接工程將會大大減少。
即係咁，錯就要認，打就企定，承建商需要為鉛禍負責，當局予以懲罰，冇人會反對。問題係，鉛水風波之所以搞到滿城風雨，人心惶惶，承建商固然有責任，但水務署、房屋署等監管部門敷衍塞責，無監無管，咁又點計呢？當局淨係搵承建商開刀，擺明卸責，點能夠服眾呢？
仲有吖，話就話係懲罰承建商，其實到頭嚟又係搵市民笨。係人都知，四間涉事承建商負責大量公屋工程，淨係停賽期間就涉及七個標書，近二萬個單位，家陣由其他承建商接手，即係變相扯高造價。呢，房委會尋日批出五項標書，除咗東涌項目之外，其餘四個項目全部超支，涉及金額最少達十億元，都咪話唔大鑊。
工程超支仲係其次，延誤先至係大問題。試諗吓，一下子少咗四間主要承建商，唔止一定會扯高造價，而且可能會拖慢興建公屋進度，所謂三年上樓嘅目標只會愈來愈遙遠，甚至連十年建屋量目標亦分分鐘凍過水。房委會自己都承認騎虎難下，進退維谷，事關如果對鉛禍承建商「加刑」，要考慮好多因素，包括建屋量以及確保有實力嘅承建商投標等，否則，隨時弄巧反拙。換句話講，懲罰承建商可唔可以解決問題，仲係未知之數，但負面影響就即時浮現，直情係未見其利，先見其弊。
所以話，成件事最無辜嘅都係市民。工程超支固然由公帑埋單，建屋延誤亦係搵輪候人士嚟搞，講嚟講去都係基層市民受害，失職官僚反而唔使受罰，簡直豈有此理！
家陣乜都假，鉛水風波搞到香港雞毛鴨血，最緊要係亡羊補牢。早排調查小組提出多項建議，話就話要堵塞漏洞，但成效如何，仲要睇過至知。港產官僚一向敷衍了事，家陣風頭火勢，焗住要做一場補鑊騷，點知過後會唔會又係不了了之o架。