泛民續用冇有怕
近日唔少建制派停用fb，皆因怕咗選舉管理委員會上屆開始針對網上媒體嘅「辣招」，其中決定暫別fb嘅立法會議員就有本身係葵青區議員嘅麥美娟同東區區議員鍾樹根。
不過善於利用社交平台嘅泛民就冇有怕，好似前日民主黨南區區議員羅健熙就喺fb度話，唔會因為選舉而唔用fb，會繼續分享生活點滴、寫下無謂嘢喎。
其實選管會之前嚴格規管fb，都面對唔少批評，所以今次選舉都放寬咗唔少，好似過去要申報嘅fb「讚好」同「分享」，今屆就唔使申報喇，而候選人出嘅貼文如果同選舉無關，亦唔會計經費。建制派都仲咁驚青，未免太可笑。