政情：鬍鬚曾度縮 部門怨氣勁
財政司司長曾俊華（鬍鬚曾）上年喺網誌公布推出「零一一」慳錢計劃，雖然各部門喺今個財政年度仲可以維持開支現狀，但下兩個年度就要每年慳錢百分之一，慳出嘅錢會「上繳中央」，政府會視乎政策優先次序再分配資源，明年四月就開始落實喇。死線慢慢逼近之際，我哋就收到消息，話多個政府前線部門，包括康樂及文化事務署、食物環境衞生署及社會福利署，都大呻「巧婦難為無米炊」。睇嚟鬍鬚曾真係要聆聽各部門訴求，唔係隨時爆大鑊。
條數可以去到幾千萬
「零一一」慳錢計劃係因應去年長遠財政工作計劃小組報告而出台，鬍鬚曾指示庫務科，研究點樣減慢開支增長幅度，最終決定要求各部門每年慳百分之一嘅開支，即係今年部門開支係一百元，下年就係九十九元，再下一年就只得約九十八元。聽落好似好少，但當呢條數增至數十億元，減幅就去到幾千萬元。
據聞呢個減幅對康文署、食環署及社會福利署呢三個前線部門影響最大，其中康文署管理好多公園、體育館、博物館，食環署就有好多外判清潔工，有人就質疑，要削減開支係咪即係少幾個人管體育館、掃街掃垃圾掃少幾次？到時市民有投訴咪仲弊？所以真係唔知如何着手。至於社署，由於多個社福機構聘請社工、社工助理等開支都係僅僅足夠，如果削減開支，社福機構隨時要炒人。
高官曾訴苦 不了了之
相信管轄呢三個部門嘅局長，包括民政事務局局長劉江華同勞工及福利局局長張建宗應該好頭痕。聞說佢哋早兩個月前已經趁高官「早禱會」直接向當時係署理特首嘅政務司司長林鄭月娥訴苦，話部門反映有困難，希望鬍鬚曾諗諗。林鄭聽完都話要跟進吓，但當時鬍鬚曾放緊大假，所以就冇下文。
政府消息人士就話，都聽到唔少同事反映「搞唔掂」，或者有部門因此感到唔高興，但重申政策原則唔係要減開支，而係按優次重新分配資源，等有需要嘅部門投標去做新政策，仲話冇部門認為唔應該落實呢個政策喎。其實前線部門有咁大意見，鬍鬚曾唔應該充耳不聞，而係要諗諗計先得。