中環出更：橫琴「踩場」 設港辦事處搶客
香港經濟面對內憂外患，對內有反水貨及「鳩嗚」等「趕客」行動，對外就面對新加坡同多個內地城市競爭，國際金融及航運中心地位岌岌可危。我哋最近聽到，原來繼深圳前海管理局去年喺香港設立辦事處後，位於珠海嘅橫琴新發展區，近日亦已「靜靜雞」喺香港設立咗辦事處並開始運作，今後海外內投資者可以直接喺香港辦手續到當地投資經商，毋須經常親身走去橫琴處理。正所謂「多隻香爐多隻鬼」，又多個地方直接登陸搶客，香港經濟真係勢危呀！
黃敬任首席聯絡官
去年成立嘅前海香港辦事處，搵咗香港菁英會榮譽主席洪為民做香港事務首席聯絡官，今次橫琴香港辦事處，就搵咗從事工程顧問業務嘅黃敬做首席聯絡官，前日星期四啱啱開始生效。呢位黃敬係咩來頭？之唔係身兼香港管綫專業學會會長、早前喺《城市論壇》同立法會議員黃碧雲爭論鉛水成因嗰位工程師囉！
黃敬透露，新辦事處共有六名職員，雖然位於中環嘅辦公室依家仲裝修緊，但佢哋已經開始投入服務，歡迎本地或境外投資者直接聯絡佢哋，以「一條龍」方式辦理到橫琴投資或經商嘅手續。佢期望辦公室喺本月內完成裝修，屆時會正式召開記者會介紹其職能運作。
卓妮