中環出更：科技取代人手 「豪」言創業自救
隨住科技發展，各行業對科技嘅應用愈來愈多。香港產學研合作促進會會長、前資訊科技界立法會議員譚偉豪（Samson）出席一個青少年分享會時就話，依家嘅科技發展一日千里，科技已經能夠取代人手，估計將來工種同職位空缺都會大減，直言自己出嚟創業會係佢哋嘅出路。騁志發展基金創立人葉少康（Nelson）亦都覺得，創業係一個學習機會，鼓勵年輕人遇到障礙時應該將其消化，轉化為推動力喎。
Samson早前出席由全國港澳研究會主辦嘅「香港青少年的生涯規劃」分享會，向中學生分享創業經驗同成功之道。佢話，現今科技發展嘅速度相等於以前三代嘅時間，好多時科技已能夠取代人手，所以估計將來嘅工種同職位空缺一定會減少，而講求邏輯、非人性化嘅工作如會計師、老師等就會首當其衝。佢仲呼籲年輕人唔好從事輕易被互聯網同科技取代嘅行業，而創業都係佢哋出路之一。佢仲透露已經減持自己創立嘅翻譯機公司嘅股份，集中火力發展創業平台。
雖然Nelson覺得並非所有人都適合同應該創業，但青少年嘗試創業唔係壞事，因為創業都係學習嘅機會。佢仲話，創業過程中內心會出現勸自己放棄嘅消極聲音，但負面情緒並唔能夠幫助突破，只會造成「自己同自己打仗」，所以遇到障礙時應該將其消化，再轉化為推動力。
鄧飛稱教師難以代替
不過香港教育工作者聯會主席鄧飛就唔多認同Samson，覺得科技難以取代教師，因為只有成熟、有自覺性嘅人先會主動上網學習，中小學生仍然要依賴老師提醒，所以科技對教師嘅影響只屬短期。佢仲話，如果學校全由機械人進行教學，會係「好恐怖」嘅情境咁話。
卓妮