古人話，綿綿不絕，必有亂結，真係冇講錯o架。國泰航空管理混亂，服務插水，搞到烏龍百出，醜聞不絕，有人早就警告，再咁落去遲早爆大鑊，話口未完，果然不幸而言中。
話說國泰一班由澳洲珀斯飛香港嘅客機，懷疑飛行途中引擎着火，要緊急降落印尼峇里。有乘客憶述當時情況，話聽到機上發出巨響，之後成個機艙漆黑一片，機身不停震動，有人睇到右邊機翼不斷冒出火花，嚇到心都離埋。雖然國泰事後死撐引擎冇起火，但專家估計事故可能同燃油喉管漏油有關，事故唔尋常，對安全絕對有影響。即係咁，今次就話有驚無險啫，下次會唔會咁好彩，冇人敢寫包單o架。
最離譜嘅係，國泰善後安排又係甩甩漏漏，導致怨聲載道。有乘客投訴飛機降落後未能即時落機，又冇人出嚟解釋發生乜事，全機二百幾人被迫喺悶熱機艙內呆等兩粒鐘；仲有吖，乘客落機後，國泰又遲遲唔安排返港，一味玩拖字訣，唔嬲就假。
話時話，國泰航班上演空中驚魂，已經唔係第一次嘅喇。早排一架由新加坡飛香港嘅航機，起飛冇耐機長突然廣播話飛機着火，結果要緊急折返；而另一班航機就因為飛行途中機艙探測出煙霧，要急降美國阿拉斯加軍用機場；一○年國泰更加試過有航機因為左邊引擎失靈，急降赤鱲角機場，多人送院治理。正如有人話齋，選乘國泰要食定驚風散，真係一啲都冇誇張。
點解國泰安全事故不絕如縷？原因好簡單，管理混亂囉。國泰之前向機師開刀，將長途航線執勤嘅機師，由以往每程四人輪流駕駛，改為三人負責操控，令機師休息時間大減三成，工會嘈到拆天，管理層一於少理，直到媒體報道百名資深機師聯署大控訴，國泰至死死氣承認因業務擴充令機師工作量大增，又話會成立工作小組檢討喎。
其實，國泰烏煙瘴氣，亂象叢生，榨乾機師只係冰山一角咋。郁吓就延誤，郁吓就超賣，直頭當顧客冇到，早就有口皆悲。有位著名時裝設計師最近喺社交網頁留言，話搭國泰機前往米蘭出席時裝展，點知航班延誤近九小時，搞到大失預算，而且全無賠償。你話嘞，今時今日咁嘅服務態度點得o架，國際排名有乜法子唔跌跌不休吖。
講到底，信譽易毀難建。呢個世界唔係只得一間航空公司，旅客有得揀，又點會貼錢買難受吖。唔該國泰好自為之，如果唔係，遲早被唾棄嘅咋！