政情：公民講場：與政府談判反口 周永康唔認帳

佔中一周年臨近，近日多名佔領行動搞手紛紛接受傳媒訪問，回憶吓舊事或追究行動失敗責任。其中有喺佔中時幫過學聯同政府溝通嘅中間人，大爆學聯本來同意咗喺同政府官員談判時，提出以撰寫民情報告同成立多方平台換取退場，但最後學聯反口拒絕提出或接受有關條件，導致談判破裂收場。學聯前秘書長周永康尋日接受電台訪問時反駁，當時學聯心目中嘅多方平台，係用嚟討論二○一七年政改，但政府堅持只能討論一七年之後嘅事，佢哋先至決定反枱，出爾反爾嘅係政府先啱。其實不論係班學生領袖定係政府官員，都成日講嘢唔算數，市民都唔知信邊個好。