政情：「廢嶽」新竇開張 示威者贈興
屢被批評為「大花筒」嘅平等機會委員會尋日畀本報踢爆豪租黃金地段太古城中心四期一個面積一千八百幾呎、呎租四十九元嘅寫字樓作為新辦事處。作為平機會主席嘅「廢嶽」周一嶽竟然仲要切燒豬，搞派對賀平機會擴充。切燒豬儀式原定喺尋日下午三點開始，不過廢嶽就遲遲未到。但當記者一走咗，佢就鬼祟現身，唔知佢係唔係有意避開鏡頭呢？
團體申訴 闊佬懶理
另外，護家協會幾名成員尋日就趁住平機會擴張派對，去到平機會新辦事處門口示威兼向廢嶽交請願信。護家協會已經去咗申訴專員公署投訴廢嶽偏袒性小眾。會長黎浩華就話，對周一嶽非常不滿，因為等咗十個月先可以同廢嶽會面，但點知廢嶽竟然打官腔，又對佢哋嘅問題諸多推搪。
對於護家協會嘅批評，廢嶽就話會同申訴專員合作。講到尾，即係對團體意見同提問佢就闊佬懶理，要去到申訴專員公署佢先至認真對待啦。工作態度咁差，唔怪得政府都唔同佢續約，要佢執包袱走啦。