政情：林卓廷捉種票變捉蟲
早前多個泛民黨派紛紛去選舉事務處投訴，指今年嘅臨時登記冊出現大量懷疑種票個案，但經過法庭審理，最後證實絕大部分個案都不涉種票，被建制派反咬擾民。選舉處尋日公布經核實嘅正式選民登記冊，民主黨（白鴿黨）總幹事林卓廷聲稱再發現唔少可疑個案，原定喺下午召開記者會公布。不過喺臨見記者前，林卓廷先發現自己搞錯咗，被迫匆匆取消成個記者會，抽水變甩轆。
白鴿黨尋日中午時分通知各大傳媒，話研究過剛公布嘅正式選民登記冊後，發現喺北區區議會石湖墟選區，有一批已被裁定住址有問題嘅選民，再以一拆二、一拆三嘅方式，轉往區內其他住址登記，懷疑有人進行集團式種票，並相約記者下午四時喺立法會舉行記者會公布詳情。
不過，當記者到達記者會會場後，發現有人匆匆將貼喺牆上嘅記者會背景大字逐隻撕走，之後林卓廷現身，自認睇錯咗臨時及正式選民登記冊嘅資料，產生誤會，經再三核對後先發現「本來無一物」，故決定取消整個記者會，並向白走一趟嘅傳媒致歉。