政情：李偲嫣周身法寶 數臭「四人幫」
有「搞事四人幫」之稱嘅壹傳媒集團前主席黎智英（肥佬黎）、前政務司司長陳方安生（民主阿婆）、民主黨創黨主席李柱銘（李漢奸）同天主教香港教區前主教陳日君成日唱衰香港，搞風搞雨，已經神憎鬼厭。去年搞事四人幫之一嘅肥佬黎仲搞埋佔領行動，擾亂香港，更令人恨之入骨。正義聯盟黨就趁佔領運動一周年前夕，數臭「搞事四人幫」，仲分別封李漢奸、民主阿婆、肥佬黎同陳日君為「惡棍」、「政棍」、「攪屎棍」同「神棍」，又將佢哋綁埋一齊、話要將佢哋繩之於法，等佢哋無辦法再作惡亂港咁話。
呼籲支持者收藏閱讀
正義亂盟黨尋日舉行佔中亂港一周年研討會，探討佔中禍害，兼為一本力數「搞事四人幫」亂港惡行嘅新書宣傳。李偲嫣話，呢本書係由一位退休校長著寫，本書詳盡記錄咗「搞事四人幫」嘅歷史，仲按時序講述「搞事四人幫」變節之路，包括由民主阿婆出任政務官講起，到佢「忽然民主」嘅變化；陳日君於回歸後突然「反共」，成為現代版猶大；「李漢奸」多次勾結外國勢力嘅事例；當然唔少得由肥佬黎偷渡嚟港，講到佢佔中「黑金事件」。李偲嫣仲話，佢已經將本書反覆閱讀多次，覺得非常值得反佔中團體收藏，呼籲支持者花時間去閱讀喎。
肥佬黎秘密坐遊艇出海
李偲嫣又話，「搞事四人幫」嚟自唔同界別，回歸十八年以嚟一直影響香港，種落嘅禍害罄竹難書。佢哋正喺度籌組網台，誓要繼續狙擊「搞事四人幫」。而呢個網台其實都籌備咗一段時間，亦有嘗試搵獨立媒體合作，暫時決定以時政節目、論政特稿同劇集為主。劇集方面，預計會有十集，每集約一小時，但都要視乎資源同經費，如果資源不足就會縮短至卅分鐘。李偲嫣又透露，十集劇集之中已經定咗有五集係送畀香港警察，係「最新嘅警察故事」咁話。
講開肥佬黎，尋日下午約五時，佢坐車抵達西貢一個遊艇會，然後再坐佢名下嘅遊艇出咗海，但睇唔到船上有冇其他人。接到接近十時，我哋又見到佢一支公坐車返抵寓所。到底佢出海去咗邊？船上有乜秘密嘉賓？佢最後喺邊度上船再番屋企？全部都係一個謎，非常神秘。