中環出更：劉業強口快快 鄉議局衝出新界
近日「去殖民化」呢個議題引起社會討論，新界鄉議局主席劉業強（Kenneth）尋日出席鄉議局「十．一」酒會時就對「戀殖」大肆鞭撻，火藥味十足。Kenneth話，雖然香港喺落實《基本法》上取得成果，但仍有一小撮前朝遺老遺少依戀過去，不時搞埋啲政治小動作。佢講講吓仲將新界鄉議局講成「香港鄉議局」，莫非佢太激動、唔小心將鄉議局衝出新界嘅大計漏咗口風？
Kenneth尋日致辭時話，今年係香港脫離英國殖民地統治十八周年，香港喺落實一國兩制、港人治港、高度自治上都取得成果，但仍舊有一小撮前朝遺老遺少依戀過去，企圖拖政府後腿，喺政治上搞小動作，破壞香港安定繁榮同團結。佢強調鄉議局絕唔會對反中亂港嘅行為袖手旁觀，亦唔容許佢哋喺新界搞事。佢仲形容鄉議局係中華民族孝順仔，亦係政府可靠夥伴添。
侯志強偕囝囝潛水
近日傳出鄉事派不滿幫民建聯（民記）抬轎多年，但民記就無乜為新界議題出聲，有人甚至提出「去民建聯化」。雖然風頭火勢，民記立法會議員陳鑑林仍然現身酒會。佢話，立法會休會咁耐都冇停過，趁住中秋節，會同五個孫仔去迪士尼樂園玩，仲買埋年票添，真係童心未泯。
至於上水鄉事委員會主席侯志強，最近就學人玩潛水。事緣佢個仔早前喺英國考獲船牌同潛水牌，兩父子出海時都會一齊潛水。佢仲話，自己係無師自通，暫時唔會考牌，因為鍾意「無牌駕駛」喎。
另外，卓妮早前發現鄉議局前主席劉皇發（發叔）喺大樓內嘅銅像起晒銅綠，尋日行過見到銅像煥然一新，相信係報道出街後，鄉議局拿拿聲派人修補，唔知發叔有無覺得老懷安慰呢？
卓妮