「鋤禾日當午，汗滴禾下土。誰知盤中飧，粒粒皆辛苦。」呢首耳熟能詳嘅唐詩，提醒大家要珍惜食物，唔好浪費，可惜，講係一回事，做係另一回事，香港浪費食物情況嚴重，尤其係港產官僚，冇做好本分不特止，仲成為大嘥鬼添。
呢，有環保團體喺私人及公眾街市做咗項調查，發現六成六菜販從未參與食物捐贈計劃，兩成半人甚至未聽過相關計劃；當被問到點解唔捐贈剩菜時，唔少菜販指根本冇機構前來收集，焗住將剩菜當垃圾丟棄，如果有機構收集，逾半菜販表示願意捐贈。
睇完調查結果，大家應該知道點解香港浪費食物情況咁嚴重，淨係食環署管理嘅七十五個公眾街市咋，每日就棄置剩菜十四噸，簡直係暴殄天物。最離譜嘅係，環保團體向食環署申請到公眾街市收集剩菜，署方居然聲稱無申請方法，又指活動無先例，拒絕提供援助。
咁都得？港府成日宣傳要珍惜食物，減少廚餘，仲搞咗個「惜食香港運動」，食環署係惜食香港督導委員會成員，有份制訂惜食指引，列明街市管理人應「將有意參與的商戶及非政府機構聯繫起來，以方便過剩食物的捐贈」，點知家陣連協助環保團體收集剩菜都唔肯，你話係咪講一套做一套吖？
不妨聽聽食環署點樣解畫，佢哋話喎，若有機構計劃喺公眾街市內回收食物，該署會喺唔影響街市日常運作嘅情況下盡量給予便利。嗱，呢啲咪就係推卸責任囉，回收食物唔係咁複雜啫，只要好好安排，又點會影響街市日常運作吖。
唔怪得香港環保愈搞愈差喇，港產官僚講就天下無敵，做就無心無力，連收集剩菜咁簡單嘅事都左推右推，仲學人講咩環保吖。年前港府煞有介事將「消滅廚餘」列入政綱，聲稱要從速處理源頭減廢，推展全港性廚餘回收計劃，而且會大力支持循環再造，鼓勵大家透過「減廢、再造、再生」三大途徑減少食物浪費喎。
講就好聽喇，事實又係點呢？香港每日產生廚餘高達三千六百噸，佔都市固體垃圾總量四成，可以裝滿一百五十部雙層巴士，真係講都冇人信。唔通呢啲就係港府「消滅廚餘」嘅戰績？
計功夫茶話齋，浪費唔止可恥，而且係犯罪。當今世界尤其係非洲仲有好多人食物短缺，想食都冇得食，而港人就將一車車食物當垃圾丟棄，唔係犯罪又係乜？退一步講，就算唔計浪費呢筆，每日咁多食物變成垃圾，三個堆填區都遲早塞爆喇！