政情：林建岳旗下商場 驚現「紙紮」解放軍
林建岳旗下麗新集團擁有嘅長沙灣廣場，近日擺放三個分別代表海、陸、空軍嘅解放軍人像公仔，向路經途人做出敬禮手勢，惹來劣評如潮。有網民話三個公仔容貌同造型生硬，十足十紙紮公仔，途人唔為意隨時會被嚇親。有人批評有關商場老闆為咗向中央獻媚，「擦鞋擦上腦」，加速香港「去殖民化」。有網民更直指「長沙灣廣場係麗新的，麗新老細林建岳係政協，愛國愛黨係常識呀」！
被揶揄配合萬聖節
長沙灣廣場管理處方面解釋，擺放解放軍人形公仔係為咗配合十‧一節慶，希望為商場增添節日氣氛，參考部分市民意見後，已將公仔從樓梯旁邊移到一樓大堂，按現時計劃公仔會擺放至過埋十‧一。有網民就揶揄三個公仔似配合十月尾的萬聖節，多過配合十‧一。