政情：改革選民登記 政黨一時一樣
選舉管理委員會今日公布正式選民登記冊，正值年底區議會選舉，早前有唔少區議員及社區幹事怕種票事件再次發生，於是向選舉事務處提交選民登記反對通知書，搞到審裁官要喺短短十七日內處理多達二千個選民登記地址反對個案。
選管會主席馮驊尋日開記者會，反駁其實今屆選舉後，都有提過要收緊選民登記，但最後社會輿論反對。唔知佢係咪暗批一班立法會議員，把口就話要改革制度，但之後就話擾民，最後搞到建議不了了之呢？其實睇番一一年區議會選舉後，政制及內地事務局都提出過公眾諮詢，話要引入辣招規管選民登記，例如要出示地址證明，搬屋後唔更改地址屬犯法，最後因為政黨唔支持，局方最後提出加強抽查解決。
二千宗反對個案中，有五百五十宗撤回反對，餘下一千四百五十一宗反對個案，八成被駁回，但當中有三百一十五宗係因為審裁官准許選民更改地址，所以先技術性駁回。至於近三百宗接納個案，超過二百八十宗係因為該人已經遷離登記地址，選舉事務處職員又搵唔到新地址；另有十宗涉及長者「被登記」或有人「被改地址」，已轉介警方調查，另有七宗因去世而接納。