中環出更：鄉局白抬轎18年 劉業強搵建制算帳
八十年代開始出任鄉議局主席嘅立法會議員劉皇發於今年六月換屆退下火線，其大仔劉業強（Kenneth）在無競爭情況下自動當選為新主席。Kenneth上場只係百幾日，已走勻新界二十七鄉了解鄉情，整理好之後會向政府提交報告。據講最令村民不滿的，是鄉議局每逢選舉都要幫建制派「抬轎」，特別係幫民建聯（民記），抬足十八年，但建制派就似乎沒有為新界傳統權益發聲，有人就建議Kenneth向民記清算這筆舊帳。
鄉紳建議組黨參選
有鄉紳批評，民記不單止無幫新界人發聲，在鄉議局亦會構成阻力，不如索性去民建聯化。眾所周知，鄉議局副主席張學明本身就是民記黨員，莫非這番說話衝着他而來？有鄉紳建議，與其依靠民記，不如自己組黨派人參選。不過，由於鄉議局是法定機構，唔可以用鄉議局名義組黨，最多只係改個名，搵個名義參選。
講開又講，每年農曆年初二車公誕，發叔都會去沙田車公廟為香港求籤，如今佢卸下鄉議局主席一職，很多人都關注明年會由邊個去求籤。而發叔每年求完籤都會解籤，有人擔心解籤並非個個應付得來，一不小心解錯籤隨時引起軒然大波，建議不如以後求籤、解籤分工算喎！