中環出更：鑽石結他創紀錄 沈運龍圓夢
能夠躋身世界之最，肯定是一項殊榮。中華廠商聯合會會董沈運龍（Aaron）半年前因為成功製作一支價值二百萬美元（約一千五百五十萬港元）嘅鑽石結他，成功創造健力士世界紀錄，確認為當今世上價值最高的結他。雖然這支鑽石結他製作耗時兩個月，但原來Aaron想創世界紀錄嘅心願，就足足等咗二十年咁耐！
話說二十年前，香港珠寶製造業商會舉辦首屆國際珠寶商展覽會，Aaron身為商會展覽事務主席，打算以廣告招徠，於是就聯繫贊助商築起一座巨型珍珠塔，並致函健力士紀錄大全申報以期列入世界紀錄。誰知健力士方面對珍珠塔毫無興趣，連眼尾都唔望一下，Aaron意圖創世界紀錄嘅念頭亦就此一度沉寂。
68人趕工生產「世界之最」
直至去年底，Aaron得知旗下公司品牌進駐瑞士巴塞爾鐘錶珠寶展主場館，為咗要令香港品牌於芸芸歐洲奢侈品牌之中打響名堂，於是打算炮製一件「世界之最」省靚個招牌。Aaron話，除咗鑽石結他外，起初仲諗過製作一件鑽石比堅尼，然後搵明星穿着並於會場內亮相。
不過，鑑於鑽石比堅尼搵明星着過一次之後，就好難有第二個明星願意再着，結果度來度去，都係鑽石結他實際啲。Aaron於是馬上組織六十八人生產團隊趕工製作，鑽石結他先至得以喺巴塞爾鐘錶珠寶展之中亮相。
價值連城嘅鑽石結他，保安當然係好嚴謹。Aaron話一般展覽場合，至少都有兩名保安貼身睇到實，而音樂演奏嘅保安措施就要再想辨法。例如剛於本月十二日在倫敦海德公園音樂節謝幕表演當中，主辦當局對鑽石結他嘅出現守口如瓶，直至已故美國歌手米高積遜嘅哥哥Jermaine Jackson用鑽石結他演出離開舞台後，先至向觀眾透露。