大家記唔記得一三年嗰單香港體壇醜聞吖？當時多支英超足球勁旅來港獻技，球迷引頸以待一睹國際球星風采，點知撞正連日落雨，香港大球場淪為大爛地，國際盛事變成國際笑話，香港乜架都丟晒。
之所以舊事重提，唔係翻舊帳，而係怕噩夢重演啫。嗱，十一月本港將會舉辦兩場國際體育賽事，其中一年一度嘅國際欖球賽假座香港大球場進行，由於草地需要時間回復，所以當局話喎，另一場盛事世界盃足球外圍賽中港大戰好大機會唔能夠喺大球場舉行。聽到呢個消息，不禁令人既失望又擔心。失望嘅係，港隊對國足係全城期待嘅戲碼，如果無緣喺大球場上演，等如○八年北京奧運開幕式唔能夠喺鳥巢體育館舉行，點都係一個遺憾囉。至於講到擔心咯喎，就更加唔使講喇，大球場話就話快將完成修復，不過質素如何依然係未知之數，萬一國際欖球賽又爆出爛地醜聞，香港咪又畀人笑到面黃！
唔係杞人憂天o架，當年香港大球場淪為「香港大農場」之後，港府急急補鑊提出多項修復措施，當時嘅講法係總預算唔超過一億元，家陣整個修復工程接近尾聲，最新報價居然縮水至三千萬元，平到令人難以置信。正所謂，一分錢，一分貨。如果港府真係識得知慳識儉，慎用公帑，能夠以最低嘅經費，修復出最好嘅球場，就梗係好喇，問題係港府出晒名大花筒，基建無一不延誤，無一不超支，家陣突然轉死性慳家，你信唔信吖？大家無嘢驚，最驚係港府敷衍塞責，修復工程求求其其，草草收場，最終又搞出笑話咋。
老實講，大球場草地問題已經唔係一朝一夕嘅事情，如果港產官僚稍為有少少「適度有為」，早就整好喇，使乜搞到今日咁狼狽吖。最離譜嘅係，大球場爛地醜聞爆出初期，當局居然縮骨卸膊，踢都唔郁，到後來群情洶湧，先至知衰幫手運送沙粒填氹，又被踢爆沙粒混雜玻璃碎同貝殼，令大球場贏得「殺人球場」稱號，點知今次會唔會鬧劇重演o架？所以話，世界盃中港大戰唔喺大球場舉行，未必係壞事嚟o架，近年中港矛盾愈演愈烈，如果兩邊球員被迫喺爛地作賽，容乜易愈踢愈火滾，搞出大件事o架，到時中港矛盾唔慌唔火上澆油咯。
都係古人講得啱，一室之不治，何以天下國家為。港府連一個小小嘅球場都管理唔好，點樣管理好香港吖？如果話大球場走過六十年歲月，見證咗香港足球歷史最光輝嘅一頁，咁大球場今日甩皮甩骨，就係港府無能嘅證據！
上次香港主場迎戰卡塔爾，有球迷搞事噓國歌，結果被國際足協調查，簡直唔衰攞嚟衰。不如咁喇，如果市民真係覺得怨憤無處發洩，不如以後齊齊噓爆港府喇！