日前提到陳佐洱講到香港不進則退，其中一個主因就是香港回歸十八年來仍沒有「去殖民化」。
的而且確，激進分子動不動就揮舞港英旗，連非政治化嘅足球比賽亦噓國歌，好心貴為政制及內地事務局局長嘅譚志源醒吓喇，仲一味埋首沙堆扮鴕鳥，話近年即使有人主張本土思想或者揮舞港英旗，亦只是「非常非常少數」，若然真係咁「少數」，香港就唔會躁動不安成咁鬼樣喇。局長大人，呢個時候拋浪頭，稍有一點常識的人都當你流啦！
老朽倒想起貞觀治道。《資治通鑒》有一段話提到唐太宗剛即位時，曾和群臣討論教化，太宗憂心承大亂之後，恐怕百姓不容忍教化。魏徵就話：「不然，久安之民驕佚，驕佚則難教；經亂之民愁苦，愁苦則易化。譬猶飢者易為食，渴者易為飲也。」
睇來魏徵呢位諫臣唔會不正視事實，唔會廢噏無謂。佢認為享受了長久太平的百姓驕奢安逸，驕奢安逸了才難以教化，經過戰亂的百姓愁苦，愁苦了倒容易接受教化，就好似飢餓的人還會嫌棄食物難吃嗎？口渴的人還會怕有污染物質而不肯飲嗎？老朽及父輩一代人，五六十年代從內地走難來香港，經過三反五反，經過大飢餓，來到香港，正是「經亂之民愁苦，愁苦則易化」，港英殖民時代嘅香港，除了六七暴動，香港大致歲月靜好，個個都在發揮獅子山下精神，努力搵食，只知道窮就要捱，就要頂硬上！
如今年輕一輩，正正是「久安之民」，驕奢安逸了才難以教化！中央對港政策「五十年不變」，荒腔走板，歷屆駐港京官均對香港亂象視而不見，「五十年不管」，才種下今日種種弊政。妖孽養大了才來談「教化」，要降魔伏怪，自然要花更大力氣！