政情：避談高鐵風波 梁國權兜路走
港鐵旗下多項新鐵路線工程延誤，其中廣深港高鐵香港段造價更嚴重超支，到依家都唔知係由港鐵定係納稅人埋單，近日更有報道指有多個高鐵承建商醞釀停工。港鐵行政總裁梁國權尋日下午出席一個有關深港澳合作嘅座談會，自然吸引咗好多傳媒去搵佢，希望佢講吓高鐵工程點收科。點知座談會未完，佢就中途離開並兜路走咗，擺明係有心避記者。
出席座談會 自吹自擂
至於梁國權喺座談會上嘅致詞，內容大部分都係賣花讚花香，話港鐵依家喺北京、天津、杭州、以至澳洲同英國都有項目，總長一千公里，經驗豐富，好希望可為國家發展作出貢獻。佢又話，港鐵每日客流量有五百四十萬人次，佔香港所有交通工具嘅四成八，而到站準時度達到百分之九十九點九喎。如果高鐵工程同造價嘅準確度都有咁高就好囉！