日前有政黨聯同一批旅遊及酒店業界人士，高調建議容許約二千萬持有電子護照嘅內地居民，透過網上申請簽證來港，以挽救步入寒冬嘅香港旅遊業。由於當日出來宣布有關建議嘅，係一位行政會議成員，令人以為該建議已獲港府甚至中央默許。不過，有熟悉相關政策嘅人士指出，兩地政府都從來冇諗過類似建議，亦一定唔會諗，因為容許內地人以護照及簽證方式來港，即係變相當咗香港做獨立國家，非常大罪！
由於香港係國家嘅一部分，加上其他歷史、政治同實際考慮，內地居民不論係旅遊、探親或營商，從來都只可透過申請雙程證來港，而雙程證嘅審批權完全喺內地當局手中，港府無權參與。單單持有護照、但無申請雙程證嘅內地人，最多只能喺香港過境轉機，唔可以行出機場禁區半步。
有關人士因此指出，畀內地人持電子護照來港嘅建議，等於打破咗成個雙程證制度，即係將部分內地人嘅出境審批權交咗畀香港，中央肯定唔會答應。若果係畀番內地審批，咁又同雙程證有乜分別呢？真係唔知有關政黨諗緊乜囉！