政情：中環出更：「鵝」來自潮州 家己冷激讚
香港有超過一百二十萬潮籍人士，但除潮州打冷受歡迎外，仲有好多其他潮州特色美食及文化都一樣值得大家保留同欣賞。香港潮屬社團總會（總會）將於十月八日至十二日，假中環遮打花園舉辦「香港潮州節」，屆時現場會布置成潮州傳統大宅，等大家恍如置身潮州，一邊品嘗潮式美食，一邊欣賞罕有嘅潮州表演。主席陳幼南就話眾多潮州美食中，獅頭鵝可以話冇得輸，好食又入味。
一班潮州「家己冷」尋日聚集於上環總會，宣布「潮州節」活動內容。陳幼南話，今次活動唔會有舞龍舞獅，但就有「舞鵝」即潮洲雙鵝舞及「鯉魚舞」，非常特別，仲有潮州布馬舞及潮劇表演等，部分連佢都未睇過。佢笑言到時隻「鵝」舞完後，會好似主題公園啲卡通人物咁同市民合照，諗起個畫面都覺得趣怪。
派杯推廣功夫茶
總會榮譽顧問藍鴻震、常務副主席張成雄及永遠名譽主席許學之則喺現場率先大歎家鄉小食，包括手打墨丸及魚蛋、綠豆餅及花生糖等。常務會董兼活動總統籌鄭敬凱指，活動期間將會有十二個美食攤位，市民可一嘗多種潮汕小食如鹵鵝、熏鴨、菜頭粿及香煎白飯桃等滋味，又會以先到先得形式派發二千隻功夫茶杯，食飽後可以斟杯功夫茶消滯。今次活動花費約三百五十萬元。
見一班前輩食得咁開心，會董陳光明及名譽會董陳香蓮就提提大家到時記得於會場自拍，參與「潮Selfie」自拍比賽，唔少會內前輩最近都因此潮學用社交網站。但張成雄笑言，唔習慣舉高手攞角度自拍，都係影吓乖孫嘅可愛樣最開心。