「議而不決，決而不行」係前國務院總理朱鎔基狠批港府嘅八字真言，估唔到今時今日朱總理早已退下，特首早已換人，呢八個字依然啱用，真係唔到你唔服。
嗱，其他唔講，淨係講有七十多年歷史嘅三級歷史建築中環街市咁吖，○三年被政府收回，六年前交畀市建局重建活化，居然搞到家陣仲係蓉蓉爛爛，丟空養蚊，有冇再離譜啲吖。
唔使問都知，活化計劃拖咗咁多年，成本必然不斷飆升。可能市建局都知衰啩，決定更改活化方案，換取項目盡快上馬。當局係咁講嘅，由於最新建造成本估價已由當初嘅五億元暴升至十五億元，難以負擔，決定放棄原有嘅「漂浮綠洲」方案，改以簡約方式活化，降低工程複雜性，成本可壓縮至六億元。如果順利獲得城規會通過，最快明年動工，二○二一年啟用。
大家睇到喇，活化一個街市啫，又唔係移山填海，居然由○三年拖到二一年至有望完工，足足十八年，簡直匪夷所思。一個呱呱墜地嘅嬰兒都長大成人咯，街市活化仲無影無蹤，呢啲唔係「議而不決，決而不行」係乜呢？
話時話，市建局聲稱新方案不涉加建，仍然維持分區計劃大綱圖所要求嘅一千平方米公共休憩空間，所以唔打算再作公開諮詢，並且會向地政總署爭取免補地價。嗱，呢啲咪係問題所在囉，新方案放棄原有設計，變相攞走成個項目嘅「靈魂」，加上商用空間比原有方案減少，仲要不作公開諮詢喎，隨時惹來地區人士反彈o架。
再講吖，活化計劃之所以一拖再拖，除咗有人提出司法覆核，另一個原因就係補地價問題，市建局同地政總署一直傾唔埋欄，家陣要求當局免補地價喎，邊有咁順攤吖。何況社會高度政治化，會唔會又有政客乘機阻撓，真係好難講o架。
見微知著，中環街市活化計劃咁多年來都係得個吉，咪就係港府蹉跎歲月嘅證明囉。本來呢，當局活化古蹟係好事，弊在拖拖拉拉，加上有人添煩添亂，唔係抗議示威，就係司法覆核，結果搞到成個計劃爛尾咁滯。不過講到尾，都係當局施政無能，如果唔係當初好大喜功卻眼高手低，又點會搞到家陣收唔到科，改完又改，淪落到同西九天幕推倒重來嘅同一命運吖。
講起都可悲，香港地寸金尺土，地價貴絕全球，尤其中環街市位處黃金地段，市值過百億元，當局繼續拖拖拉拉，同暴殄天物冇乜分別嘅咋。怕就怕，當局基建延誤成為常態，活化大計二○二一年可唔可以成功，都係望天打卦咋。