貪曾一案拖足三年半有多，至今依然未見有任何人被拘捕或檢控。今年六月二十三日，律政司刑事檢控專員楊家雄大言炎炎，公開承諾會在三個月內，亦即九月二十二日決定是否檢控貪曾。
然而，秉承本屆政府處事作風——講咗當做咗；本報查詢有關貪曾一案進展，律政司又改口話因收到廉署最新資料，又要等「法律意見」，咁搞法，老朽相信貪曾有生之年，即使將呼出最後一口氣，「新資料」仍然會出現，而「法律意見」仍然在「徵詢」，睇怕貪曾可由地上逍遙到天堂也！
老朽唔怕長氣，又要同大家溫故知新。《論語》子貢問政，子曰：足食足兵，民信之矣。子貢曰：必不得已而去，於斯三者何先？曰：去兵。子貢曰：必不得已而去，於斯二者何先？曰：去食。自古皆有死，民無信不立。
國家要穩定，除了糧食足，兵力強，孔子認為最重要的，無過於統治者要得到人民的信任。失去了人民的信任，國必垮政必亂！
廉署立案查貪曾案，本報圖文並茂列舉貪曾如何「貪遍省港澳，歎盡海陸空」，其涉以權謀私彰彰明甚，而每次刑事檢控專員接受傳媒查詢時，都係話「很快很快」，如是者，秋去冬來，花開花謝，到如今三年半過去了，依然在「徵詢法律意見」。
阿哥，如此兒戲，如此拖泥帶水，法律大公無私面前，耍盡無數香港市民期盼嘅雙眼！
律政司一再反口，言而無信，食言當食生菜，你話市民對執法及檢控部門還有甚麼期望？香港法治倒退，所謂「法律面前，人人平等」，係講一套做一套，對住曾蔭權爵士，其醜聞即使成本電話簿咁厚，吾人亦只能慨嘆：活在香港，時光倒流三千年，刑不上大夫，禮不下庶人也。