政情：八網難逃：「根」潮流玩 「妖魔」報告
立法會議員鍾樹根將名為「根你報告」嘅工作報告上載至社交網站，除咗報告名稱玩食字外，內頁連「妖魔鬼怪」都玩埋，莫非配合萬聖節主題？報告將立法會「拉布」、港台興建新大樓、西九文娛藝術區及港鐵超支等議題，按「妖魔鬼怪」嚟命名，分別為佔中妖、拉布魔、大嘥鬼、燒錢怪及超支精，真係夠晒噱頭。
原來樹根為咗份工作報告，聘請咗星級設計公司，難怪喺設計上咁有諗頭啦！不過，今次並非佢首次聘用設計公司，早在三年前宣布參選立法會選舉時，佢就請咗呢間設計公司為佢設計「升級」宣傳橫額，但被網民惡搞為豐胸「升cup」廣告添，唔知今次呢份工作報告又會唔會出事咁呢？
（互聯網）