全國港澳研究會會長陳佐洱日前話香港回歸之後未有做好「去殖民化」嘅工作，引起社會爭議。特首梁振英（CY）尋日被追問對陳佐洱言論嘅睇法、有冇壓力要為《基本法》第廿三條立法時就話，根據《基本法》香港對國家有責任，香港居民喺《基本法》下有基本權利，但係亦對香港同國家有基本義務，所以最重要嘅一點就係必須兼顧權力同責任、權利同義務。講咗一大堆嘢，CY都冇回應到去殖民化嘅工作，難怪立法會議員劉慧卿都唔知佢講乜。
CY尋日講完一堆又「權利」、又「義務」嘅嘢，聽到大家一頭霧水，卿姐聽完都忍唔住暗踩CY唔得「堂堂正正」︰「如果佢對廿三條有意見咪公開講囉！唔使暗示，堂堂正正做一個香港特區嘅官員啦！」反觀卿姐意見就明確得多，話特區政府有足夠權力處理佔領行動，可見冇急迫需要就廿三條立法，不如等有直選嘅特首同立法機關先至處理都未遲喎。