民主黨創黨成員狄志遠（Dick）於月初宣布退黨，與被踢出民主黨嘅前立法會議員黃成智籌組新政黨「新思維」，走中間溫和路線。萬事起頭難，籌組新黨實要面對無數難題，點知阿Dick已搵到大水喉，新政黨未成立已好疊水。
阿Dick自知社會走向兩極，只有泛民同建制兩大陣營，所以已預料到開拓新路線嘅新思維會腹背受敵，而坊間亦會認為定位唔夠清楚。有見及此，阿Dick已經請咗專業公關，為新思維建立品牌同形象，就連形容政黨嘅不同長短字句都要度清度楚。
花錢請公關相信已經使咗唔少錢，但原來新思維大把錢，阿Dick仲話預計今年可以籌到三百萬元添！因為近期已經密密同多個界別、持相同理念嘅人士會面，當中包括商界及無預計過會接觸嘅人士。
而新思維重頭戲就係明年一月嘅籌款晚會，由商界人士包場畀阿Dick筵開四十圍。阿Dick仲話會邀請前黨友到場，因為大家相識三十載，相信會到場為老友開心。不過，開心還開心，舊黨友會否妒忌新思維咁疊水呢？