中環出更：傑青也批貪曾氣候逃犯
傑出青年協會（傑青會）早前率領一班學生到北京交流，日前就舉行交流分享晚宴。卓妮見到曾當選過傑青的香港天文台前高級科學主任李偉才（Eddy），佢話現時環境問題比大家想像中嚴峻很多，若不正視有關問題，地球人將活不過這個世紀。Eddy話，其實六年前在丹麥哥本哈根會議時，各國已好緊張減碳問題，可惜時任特首「貪曾」曾蔭權爵士漠視有關問題，被批「氣候逃犯」。
今年十一月底國際氣候高峰會議會於法國巴黎舉行，Eddy就話問題已比之前更嚴重，而香港難以單獨進行去碳計劃，必須與內地廣東省緊密合作，因此若中港矛盾持續，年輕人不願與內地合作，問題就好難改善喎。
同場仲有前傑青、叙福樓集團執董黃傑龍（Simon），講到名廚Jamie Oliver坦承推動學生飲食健康失敗，認為只有中上層人士才有條件注重飲食，Simon就覺得兩者並無衝突。佢舉例，之前佢哋推出代用飯餐有好多唔同選擇，以為豆腐及疏菜較適合長者，點知結果係長者個個都揀豬扒餐，因為覺得豆腐價錢便宜，自己都買到，相反豬扒貴啲又難煮，反映基層需要先滿足基本所需營養後，先再談健康啫。
帶學生北京交流有體會
講番傑青會今次帶一班學生去完北京交流，主席甄韋喬話，覺得年輕人的性格及能力同家長如何培養有密切關係，佢發現現時除咗怪獸家長外，亦有部分家長因害怕影響親子關係而逃避向子女灌輸正確價值觀，認為家長平日應避免嘮嘮叨叨，嚇怕子女，但有重要事情就一定要交代清楚，假設兒子帶個女仔返屋企過夜咁大件事，就一定唔可以避而不談喇。
卓妮